As aventuras do Zeppelentín

Un globo que incendiou Malveiras e un subarmiño foron dúas das invencións dunha Orde irrepetible, nacida nos 70
SERXIO GONZÁLEZ a Voz de Galicia colaboracion co Faiado
06/02/2010
Din os que disto saben que a Orden del Zeppelentín naceu aló por decembro de 1969. Inspirados no taller e nas inquedanzas mecánicas do señor Valentín Viqueira, un grupo de mozos liderados por Manuel Reigada e afeccionados a frecuentar as noites do bar Central, deron en constituír na Vilagarcía daqueles anos unha fenomenal Orde de Cabalería. O seu moi digno cometido consistía en empregar o seu tempo de verán, non en desfacer entortos, senón en darlle ao caletre para montar finas enleadas e inventos merecentes dos mellores enxeños daquel doutor Franz de Copenhague que ilustraba as páxinas do TBO .

A etimoloxía da simpar organización responde a unha sinxela ecuación: Zeppelín (que seica sobrevoara a ría de Arousa nos anos 30) + Valentín = Zeppelentín. Axiña acometeron os zeppelintinianos a primeira das súas empresas: construír e facer voar, precisamente, un zeppelentín . A data escollida foi o 22 de agosto de 1970. De boa mañá, ducias de homes, mulleres, nenos e algunha señora embarcan en Carril con destino ás Malveiras. Alí agarda, na rampa de lanzamento , o artefacto aeronáutico, de tremenda estampa e inigualable tronío.

Cando todo está presto para brindar polo trunfo, o aparello comeza a arder. O lume esténdese por monte e toxos ata rodear o mítico cruceiro da illa grande. O persoal marcha a fume de carozo mentres o incendio medra. Supoñemos que o delito terá prescrito nestes case trinta anos. Mais por se algún Sherlock Holmes quere investigar pola súa conta, aí vai o enderezo do blog do Faiado, no que pode ollarse un completísimo vídeo sobre a azarosa xornada: www.blogoteca.com/ofaiadodamemoria/. Lonxe de arredarse diante do destino icárico do zeppelentín , os membros da súa Orde teiman, ano tras ano, en argallar novas invencións: o submarinentín , botado tamén en Malveiras e afundido con honras a carón do Club de Mar; o tanquerrentín , un tanque co seu correspondente armamento construído sobre un Gordini que custara 5.000 pesetas e deu baixado a costa de Lobeira; unhas solemnes xustas medievais no pazo de Oca, con torneo a lombos de bicicletas incluído; e a última fazaña, unha catapulta que lanzaba globos de auga. En 1974 a Orde disgrégase, aínda que Carlos Morales consigue reunir damas e cabaleiros en dúas ocasións máis. E este ano... quen sabe.
Na imaxen Paulino Mouriño e a sua dona xunto a Celestino Silva nunha festa da Orden dos Zeppelentinos no Galloufa en Carril

O Faiado da Memoria